Чавков: Сериозни индикации за криминал и корупција во Охрид

Директорот на Бирото за јавна безбедност Митко Чавков, претствници од Министерството за внатрешни работи и финансиската полиција денеска ја посетија општина Охрид и остварија средба со градоначалникот Никола Бакрачески.

Целта на состанокот, според Чавков, биле индикативните состојби кои укажуваат на постоење криминални активности во претходното работење со општина Охрид, поврзано со работењето на претходниот градоначалник.

- Разговаравме во врска со сомневањата за криминални активности, кои сега се во форма на основи, значи ништо конкретно. Но, тоа е сосема доволно да ги интезивираме нашите активности и да ги продлабочиме истражувањата. Имаме првични информации за финансиски криминал, корупција и така натаму, изјави Чавков по средбата.

Тој посочи дека утврдиле општи ориентации за работа на тимски пристап заедно со претставници на Финансиската полиција и претставници од други институции во Република Македонија.

- Веројатно многу брзо ќе го прошириме составот со претставници од Јавното обвинителство на Република Македонија, од Јавното обвинителство за организиран криминал и со колеги од СВР Охрид, додаде Чавков по состанокот во општина Охрид.

Во рамки на посетата на Охрид, директорот на Бирото за јавна безбедност ќе оствари средба и со претствници на СВР Охрид на која треба да разговараат за безбедносната состојба во градот.

- На состанокот со претставници од СВР Охрид ќе разговараме за темелната анализа, која веќе ни е подготвена и ќе биде основа за планирање на интензивни мерки и активности за претстојната туристичка сезона. Фокусот ќе биде на јавниот ред и мир, на криминалитетот и безбедноста во сообраќајот, посочи Чавков пред средбата во СВР Охрид.