Спасовски се сретна со претставничката на ОБСЕ/ОДИХР Шустик

Генералниот секретар на СДСМ Оливер Спасовски денеска имаше средба со политичкиот аналитичар во набљудувачката мисија на ОБСЕ/ОДИХР Елен Шустик.

Шустик се интересирала за досегашниот тек на изборната кампања за претседателските и предвремените парламентарни избори и за искуствата на СДСМ во изборниот процес. Таа, како што соопшти партијата, побарала од опозициската партија да ги евидентира и документира сите докази за изборни нерегуларности и да ги достави до надлежните институции и набљудувачката мисија.

Генералниот секретар Спасовски, како што се наведува во соопштението, информирал за употреба на државни ресурси во кампањата за придобивање гласачи. Медиумите, според Спасовски, имаат селективен пристап при известувањето.