Десет години од смртта на претседателот Борис Трајковски

Македонија и Босна и Херцеговина денеска ќе одбележат десет години од смртта на поранешниот македонски претседател Борис Трајковски, кој го загуби животот во авионска несреќа кај Ротимље во близина на Мостар.

На одбележувањето на деветгодишнината од трагичната смрт на Трајковски во Ротимље ќе присуствува македонска делегација на чело со македонскиот претседател Ѓорге Иванов. Во составот на делегацијата ќе биде и министерот за образование и наука Спиро Ристовски, како и претставници на АРМ.

На спомен обележјето свои обраќања ќе имаат претседателот Иванов и претседавачот на претседателството на БиХ, Жељко Комшиќ.

На одбележувањето во Скопје, во Алејата на великаните на Градските гробишта во Бутел цвеќе на гробот на Трајковски ќе положи собраниска делегација составена од Светлана Јакимовска, Сузана Салиу, Силвана Бонева, Игор Ивановски и Рејхан Дурмиши.

Претседателот Борис Трајковски загина на 16. февруари 2004 година во авионска несреќа во близина на Мостар. Во несреќата, покрај Трајковски загинаа Димка Илкова-Бошковиќ, Ристо Блажевски и Анита Кришан Лозановска од Кабинетот на претседателот, Миле Крстевски од Министерството за надворешни работи, Борис Велинов и Аце Божиновски, членови на обезбедувањето и пилотите Марко Марковски и Бранко Ивановски. 

Владиниот „Кингер“ со кој претседателот Трајковски патуваше на Меѓународна конференција за инвестирање во Босна и Херцеговина, на 26 февруари 2004 година се урна во атарот на Матиќ Брдо кај селото Хусковиќи во близина на Мостар. Авионот требаше да слета на мостарскиот аеродром во осум часот по локално време. Остатоците беа пронајдени 24 часа по паѓањето на авионот.

Според првичната истрага на надлежните македонски и босански органи, причина за уривањето се пропусти на екипажот направени во процедурата за приоѓање на аеродромот Мостар во услови на сложена метеоролошка состојба, густа магла и облачност.

Откако македонското МВР собра дополнителни докази, на барање на Македонија беше отворена нова истрага во јануари 2013 година.

Главниот истражител на меѓународниот тим и претседател на Комисијата за воздухопловство при Министерството за сообраќај и комуникација на Босна и Херцеговина, Омер Кулиќ, потврди дека новата истрага е завршена и оти со неа ќе биде ставен крај на случајот „Трајковски“.

Иако првично беше најавено дека комисијата ќе ги презентира своите наоди на 10-годишнината од загинувањето на Трајковски, сепак резултатите ќе ги дознаеме во март или април годинава. Резултатите од истрагата најпрво ќе ги добие обвинителот на БиХ.

- Истрагата генерално е завршена. Остана да добиеме уште два-три ситни детали. Се работи за документи на службата. Остана тоа да го подготвиме, да ги дадеме мислењата кои мораме да ги пратиме и да ги објавиме, рече Кулиќ.

Како што истакна Кулиќ, обвинителот на БиХ ќе одлучува, дали по негово мислење има елементи за некои кривични дела, а во соработка со обвинителот од Македонија ќе анализира, ќе се усогласува, ќе проценува што се случило со авионот на претседателот Борис Трајковски на 26 февруари 2004 година. 

Борис Трајковски е роден во Струмица на 25 јуни 1956 година. Тој беше втор претседател на Република Македонија во периодот од 15 декември 1999 година до 26 февруари 2004 година.

Трајковски дипломира на Правниот факултет во Скопје во 1980 година, специјализира деловно право и право на работни односи. 

Од 21 декември 1998 година ја извршуваше функцијата заменик-министер за надворешни работи на Република Македонија во Владата предводена од Љубчо Георгиевски. Трајковски исто така беше претседател на Комисијата за надворешно - политички односи на ВМРО-ДПМНЕ, главен политички советник за надворешна политика на претседателот на партијата, член на Претседателството на невладината организација Паневропско движење за Република Македонија и на меѓународната конференција „Решавање на конфликти“ со седиште во Атланта, САД. Бил претседател на младината на Обединетата методистичка црква во поранешна Југославија повеќе од 12 години.

Трајковски стана претседател на Република Македонија во 1999 година. Должноста претседател на државата ја извршуваше до 26 февруари 2004 година.