EУ побара избори во Украина

Европската унија денеска упати остра критика кон украинскиот претседател Виктор Јанукович и побара во Украина да се формира нова влада, да се спроведат уставни реформи кои би довеле до „слободни и фер претседателски избори“.

Во заедничкото соопштение по состанокот на министрите за надворешни работи на 28 земји-членки на ЕУ во Брисел, се истакнува дека Унијата е „вознемирена поради кршење на човековите права, насилството, случајот со исчезнатите лица, мачењето и заплашувањето“ до кои дошло во рамките на обидот на власта да ги задуши протестите во земјата.

Министрите на состанокот повторија дека ЕУ е подготвена финансиски да и помогне на Украина, под услов да се формира нова влада која би „спровела економски и политички реформи“.

 Новата влада и уставните реформи кои би ја повратиле рамнотежата на власта и подготовките за слободни и фер претседателски избори би придонеле Украина да се врати на одржливиот пат на реформи, се наведува во соопштението.