СДСМ: Давкова и ВМРО-ДПМНЕ ослободуваат криминалци и нарко босови

Шокантни се скандалозните помилувања од страна на претседателката Сиљановска Давкова, обвинува опозициската СДСМ.

Според партијата, Давкова помилувала осудени криминалци, дел од нарко кланови, уапсени во големи полициски акции со заплени на оружје, пари и дрога.

-Најшокантно е помилувањето на припадници на криминалниот нарко-клан „Барон“, како и роднини на познатиот Шенки. За дел од помилуваните има основани индиции дека се вмешани и во други кривични дела и криминални пресметки, како што беше пукањето во Чаир. Помилувани се и поранешниот градоначалник на Битола, Владимир Талевски кој беше во затвор по пресуда за случајот „Транспортер“ и Марјан Ефремов, првоосомничен во аферата „Шпион“. Со овие скандалозни одлуки Давкова застана во заштита на криминалците и нарко клановите, велат од СДСМ.

Според опозициската партија, ова е погазување на правото и правната држава.

-Ова е силен удар врз безбедноста на граѓаните и врз работата на полицијата и надлежните институции. Сето ова се случува во време кога се загрозува безбедносниот систем и со партизација на Агенцијата за национална безбедност. Осудени криминалци треба да се соочат со правдата а не да шетаат слободно и да хараат по улиците. Во услови кога на улиците има зголемени криминални пресметки, овие помилувања дополнително ќе ги охрабрат криминалците со што директно се загрозува безбедноста на граѓаните. Давкова го поткопува владеењето на правото и даваат сигнал дека секој што е под заштита на власта може да прави што сака, се вели во дописот.

Од СДСМ бараат Силјановска Давкова веднаш да ја повлече одлуката.

-Клучното прашање е зошто Давкова ја носи оваа скандалозна одлука?

Дали власта има дил со криминалните структури кои се ставаат во нивна служба на овој начин? Ова е скандал од огромни размери и со сериозни последици за безбедноста на граѓаните. СДСМ бара претседателката Силјановска Давкова веднаш да ја повлече скандалозната одлука, се вели во соопштението од опозициската пратија.