Ѓорѓиевски: Започнавме со изградба на мини рекреативен центар во Усје
Со реализација на уште еден голем проект, Кисела Вода го започнува денешниот 29 јуни, на кој се одбележува 68-миот роденден на општината. Градоначалникот Орце Ѓорѓиевски денес го посети Усје, во близина на крстот, каде започнува изградба на мини рекреативен центар. На просторот кој зафаќа околу 800 квадратни метри ќе биде поставена урбана опрема, клупи, детско катче, парковско зеленило, ќе се изгради и паркинг за посетителите. Градежните работи ќе бидат готови за еден месец, по што жителите од овој дел на градот ќе имаат за себе нов простор за одмор, дружење и за рекреација.
-Денес ќе се случуваат серија од настани, по повод 68-от роденден кој го прославува Општина Кисела Вода. Утрото го почнуваме во Усје, кај Крстот, каде започнуваме со градежни активности што ќе го оплеменат просторот и ќе му дадат квалитетна содржина. На овие 800 квадратни метри градиме мини рекреативен центар на кој ќе има урбана опрема, клупи, реквизии за детско катче, парковско зеленило, а ќе биде решено и паркирањето преку изградба на паркинг простор. Истиот ќе биде готов за еден месец-истакна градоначаликот Орце Ѓорѓиевски, информирајќи и за другите настани со кои ќе се одбележи денешниот роденденски ден.
-Паралелно во општината од утрово се одвиваат бројни активности. 300 талентирани ученици, спортисти и наставници добија награди-ваучери од општината за остварениот успех. Точно напладне почнува свечената седница на Советот, каде статуетки-клучеви од општината ќе добијат 25 заслужни граѓани. Благодарници ќе добијат и претседателите на месните задници кои преку својот секојдневен ангажман се значајна алка во процесот на остварување на правата на граѓаните. Во 17 часот во паркот Шопен почнува хуманитарна Коријада во организација на Здружението на пензионери од Кисела Вода, а потоа ги очекуваме сите пред салата Расадник. Битката на бендови започнува во 18 часот, од 21 часот настаува DJ Mats, а од 22 најавуваме голем концерт на Нокаут. Ветуваме добра забава како и досега. Имено, концертите организирани по повод културното лето и роденденот на Кисела Вода, ги виде публика од преку 50 000 жители. Се надевам дека и роденденската прослава ќе помине во ист дух-истакна градоначалникот Орце Ѓорѓиевски.
29.06.2023 - 11:56
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
