Видеото во кое Ахмети нервозно ја коментира бројката на албански партии е снимено пред 2 години

Видеото кое  беше објавено во медиумите на за кое се вели дека снимено вчера по лидерската средба, а на кое лидерот на ДУИ Али Ахмети во емисија на ТВ 21 нервозно тропа по масата, незадоволен од бројноста на албанските претставници кои дошле на средбата кај претседателот Стево Пендаровски, е снимено пред две години.

Медиумите ја објавија оваа вест откако видеото беше објавено на социјалните мрежи од страна на вицепремиерот и портпарол на ДУИ, Бујар Османи.

 – Да се освестат и да ги обединат Албанците, а не да ги поделат. Срам ми е да одам на средби со шест делегации на партии на Албанците и велиме дека сме Албанци со образование, со универзитети. Какви универзитети имаме? Какво образование имаме? Срамно е за Албанците, шест албански делегации се таму, а само две македонски, една на власта и една на опозицијата. Доаѓа Беса со шестмина оти не си веруваат меѓусебе, доаѓа Села со три-четворица, доаѓа, доаѓа Тачи со двајца, тројца, Али Ахмети со двајца, тројца, доаѓа Гзим Острени со двајца, тројца. Ова е срамно, и ми велите мене дека јас сум ги навредил. Со престапници веќе нема да седам и мислам дека имам морално и национално право да им се обратам на Албанците дека не ни требаат 10 партии. Шест партии, а 10 мандати. Ја повикав цела опозиција на Албанците да биде против ДУИ, затоа што Албанците ќе изгубат и тоа се случи. Изгубија 10 пратеници. Многу сме поделени… поделени се семејствата. 1000 ваму, 1000 таму. Сите сакаат да станат први, вели лидерот на ДУИ во видеото.