Трет случај на морбили во Македонија
Трет случај со морбили (мали сипаници) е регистриран во Република Македонија.
Д-р Жарко Караџовски од Институтот за јавно здравје на Република Македонија денеска изјави дека трите случаи со морбили се регистрирани во Скопје, Куманово и Тетово.
Потенцира дека едното лице е на возраст од пет месеци и не подлежи на вакцинација, второто лице машко на 40-годишна возраст и е вакцинирано само со една доза МРП, а последниот случај кој е регистриран на 23 месецов е дете на петгодишна возраст кое има примено само една доза вакцини.
- Ако ја завршивме минатата година со дваесетина случаи на морбили и рековме дека состојбата веројатно ќе се подобри, за жал ова ни кажува дека морбилите се се уште присутни во државата и лесно може да дојде до инфекција. Мој апел до институциите кои спроведуваат вакцинација е максимално да се придржуваат до календарот на вакцинација, активно да се избаруваат сите случаи на невакцинирани лица и веднаш да им се аплицира вакцина со цел да се намали контактот односно да се спречи ширењето на овој вирус, рече Караџовски.
Посочи дека во Србија и Хрватска има повеќе илјади заболени лица, дури има и тешко болни.
- Овие лица сите што беа во Република Македонија беа хоспитализирани и засега немавме тешки случаи. Меѓутоа апелот е календарот на вакцинација да се апсолутно подобри, да се добие 95 отсто опфат со вакцинација за оние вакцини кои се предвидени во рутинскиот календар, додаде Караџовски.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа