Награди за најдобрите на сениорското првенство во одбојка „Скопје 2013“

Одбојкарските двојки Динова/Ангелова од Бугарија во женска конкуренција и Николиќ/Киковиќ од Србија во машка конкуренција, ги освоија првите места на Балканското сениорско првенство во одбојка на песок „Скопје 2013“, што во изминативе три дена се одржуваше на игралиштата на Градската плажа „Парк“.

На најдобрите одбојкарски двојки, медалите синоќа им ги врачи градоначалникот на Град Скопје, Коце Трајановски.

- Ми претставува особено задоволство што во изминативе три дена на овие терени гледавме квалитетни натпревари во одбојка на песок. Ова Балканско сениорско првенство во одбојка на песок што во Скопје се одржува првпат влезе во календарот на Светската федерација за одбојка на песок, истакна Трајановски.

Второто место на овој турнир го освоија двојките Бус/Смултеа од Романија, во женска конкуренција и Антониќ/Галешев од Србија, во машка конкуренција. На третото место се пласираа двојките Малинова/Сланчева од Бугарија и Колев/Митев од Бугарија.

Балканското сениорско првенство во одбојка на песок „Скопје 2013“ е во организација на Град Скопје и на Одбојкарската Федерација на Македонија. Покровител на турнирот е градоначалникот на Град Скопје, Коце Трајановски.

На турнирот, покрај две репрезентативни машки и две женски одбојкарски двојки од Македонија, учествуваа екипи од осум балкански држави: Србија, Романија, Албанија, Турција, Босна и Херцеговина, Бугарија, Црна Гора и Молдавија. Скопје за првпат беше домаќин на сениорско Балканско првенство во одбојка на песок, со најголем број учесници, над 50 натпреварувачи и околу 10 официјални лица, делегати и меѓународни судии. За првите три места во машка и во женска конкуренција обезбедени се награди во вредност од по 3.500 евра.

Меѓународен спортски настан е дел од Програмата за одбележување на 50-годишнината од катастрофалниот земјотрес во Скопје.

ФОТО: Дневник

 

најчитано сега