Сочувство од пратеничката група на ВМРО-ДПМНЕ за настраданите во Ница
Пратеничката група на ВМРО-ДПМНЕ и коалицијата „За подобра Македонија“ до амбасадорката на Република Франција во Република Македонија Лоренс Оер изрази жалење и сочувство до сите повредени и до семејствата на загинатите во вчерашниот терористички напад во францускиот град Ница.
- Пратеничката група на ВМРО-ДПМНЕ и коалицијата „За подобра Македонија“ со длабока тага и неверување ја прими веста за грозоморниот и кукавички чин на прославата на францускиот државен празник во Ница, Република Франција. Силно Ве уверуваме дека мислите и молитвите на секој македонски граѓанин во овие тажни мигови се со Франција и францускиот народ, соопштија од пратеничката група на ВМРО-ДПМНЕ.
На вакви или слични терористички напади во изминативе неколку години, како што се наведува, не останаа имуни повеќе држави во светот, меѓу кои и Република Македонија. Токму затоа, стои во соопштението, ние како Македонци и граѓани на Република Македонија многу добро го познаваме чувството на огорченост и осуда кон вакви сурови и злосторнички терористички напади.
- Оттука, независно од тоа каде и на кој начин се случуваат вакви напади, тие претставуваат напади врз човештвото и против тоа мора и треба да се бориме заедно. Бидете сигурни дека вакви кукавички терористички напади само го зголемуваат чувството на солидарност и ја зајакнуваат нашата заедничка борба и заложба за победа против ова зло кое сее страв насекаде во светот, не препознавајќи ниту религија ниту националност. Пратеничката група на ВМРО-ДПМНЕ и коалицијата „За подобра Македонија“ уште еднаш изразува искрено и длабоко сочувство до семејствата на настраданите и повредените и истовремено во овие тешки мигови за француската држава стои на располагање во секој момент и подава рака за поддршка на народот на Република Франција, се вели во соопштението.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа