Генерацијата која ја извојува независноста и самостојноста ќе остане запаметена во македонската историографија
Се разбира на овој простор, и во овие активности, не биле вклучени само оние кои се идентификувале како Македонци, туку и припадници на други нации и народи кои живееле на истиот простор, а кој се идентификувал со поимот Македонија.
Борбата за слобода е заеднички плод на залагањата на сите нив, на македонците, но и на сите кои заеднички со македонците во различни етапи повеќе или помалку се бореле за таа слобода и независност на Македонија, како албанците, турците, ромите, србите, власите, бошњаците, христијаните, муслиманите, евреите, атеистите, ...сите, истакна премиерот по повод обраќањето за 8 Септември, Денот на независноста на Република Македонија.
Таа борба, додаде тој, продолжува и подоцна во втората свестка војна и дополнително добива на интензитет. Во редовите на таа борба која ја предводела комунистичката партија, се вклучиле сите.
-Дел од нив биле идеолошки припадници или подржувачи на комунистичката партија и идеологија, но огромен дел небиле, но верувале и почуствувале дека тоа е историската шанса, историскиот момент за остварување на конечната цел, за извојување на слобода и за создавање на своја држава. Еден од клучните сигнали кон сите припадници борци, е фактот што комунистичката партија на интернационално ниво, уште во самите зачетоци донела одлука да се признаат малите народи и нации и да им се признае државноста, меѓу кои и на Македонија и македонскиот народ. Тие документи се усвоени во 20тите години најпрвин на меѓународно ниво, а подоцна и на ниво на КПЈ, уште пред стапувањето на Јосип Броз Тито за нејзин генерален секретар и останале непроменети до крајот на втората светска војна, по што и реализирани. Тогаш, имајки го во предвид даденото ветување од пред војната, имајки ја во предвид антифашистичката борба, имајки го во предвид деценискиот отпор и борба на македонскиот народ и другите народи на овој простор водени главно од ВМРО, и имајки во предвид дека после таква крвава војна и борба за слобода на Македонија, неисполнувањето на даденото ветување ќе значи понатамошни крвополевања и континуирани проблеми, имајки ги и во предвид потребите на тогашниот водач на КПЈ за баланс во државата со формирање на повеќе федерални републики, наместо со помалку и некои од нив да се предоминантни по големина републики, се создава историскиот момент кога се добива државноста, но само во рамките на Југославија, додаде Груевски.
Следуваат 45 години на тежок и брутален режим но и на континуиран отпор на народот за целосна независнот кој преку разни етикетирања, затворања и ликвидации се потиснува или прикажува на поинаков начин во тоа време.
-И сето тоа трае до следната историска шанса, која доаѓа со падот на комунизмот во сите земји во Европа, па и во Југославија, и со распаѓањето на Југоловенската федерација. Тоа е повторно историски момент, историска шанса, која правилно се искористува, за конечно создавање на слободна, суверена и независна Република Македонија, заокружено преку активностите на политичките партии и парламентот, и запечатен со референдумот токму на овој ден на 8ми септември, во 1991та година. Генерацијата која ја извојува независноста и самостојноста заслужува благодарност од сите следни генерации. Таа генерација во виорот на новите времиња и под татнежот на неприликите кои се случуваа во соседството успеа да донесе правилни одлуки, и покрај сите парцијални слабости и недоречености на тие одлуки, сепак, ние оддаваме должна почит на таа генерација, и таа генерација ќе остане запаметена во македонската историографија, заклучи премиерот.
Оцени ја веста
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа