Трофејот на Еуро баскетот на 8 август во Охрид
На 8 август во центарот на Охрид кошаркарските фанови, но и сите љубители на спортот и добрата забава, ќе имаат ексклузивна можност да бидат дел од овогодинешната „TROPHY TOUR“ - турнеја на ЕУРО БАСКЕТ-трофејот, пренесе МИА.
Во секоја земја-учесник на ЕУРО БАСКЕТ 2015, Националната кошаркарска федерација и партнерите на ЕУРО БАСКЕТ го презентираат Трофејот на ЕУРО БАСКЕТ 2015. Освен промоција на Европското првенство и учеството на националната селекција, со овој настан се промовира и самиот домаќин на Трофејот преку видеоклип изработен од ФИБА во кој ќе бидат претставени културно-историските знаменитости и убавини на земјата.
Воедно, фановите и граѓаните ќе имаат шанса да се сликаат со Трофејот и Маскотата на ЕУРО БАСКЕТОТ – „FRENKIE“, како и да се дружат со кошаркарските легенди и активните репрезентативци кои ќе бидат поканети да се приклучат на настанот.
„ТROPHY TOUR“ – турнејата на ФИБА-трофејот започна на 19 мај во Рига (Литванија) и откако ќе пропатува низ сите земји-учеснички на ЕУРО БАСКЕТ 2015, ќе заврши на 30 август во Келн (Германија). Во Македонија трофејот ќе пристигне од Варшава (Полска), а потоа ќе биде испратен кон Антверпен (Белгија).
Овој трофеј е изработен од најфини материјали – злато и сребро во комбинација со 24 скапоцени камења, а негов автор е германскиот златар Гинтер Шобел. Трофејот тежи 18кг, висок е 23cм, со дијаметар од 35см и е поставен на мермерно подножје. Именуван е по Николај Семашко (1907-1976) кој бил поранешен претседател на Советскиот спортски комитет и потпретседател на ФИБА од 1960-1976 година, а од 2007 година е и член на Куќата на славните на ФИБА.
ЕУРО БАСКЕТ, порано нарекуван Европско кошаркарско првенство, е најзначајното натпреварување во репрезентативната кошарка во организација на ФИБА Европа.
Оцени ја веста
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа