Се гради повеќенаменско спортско игралиште во велешко Караслари

Во велешкото село Караслари денеска започнаа градежните активности за изградба на ново повеќенаменско спортско игралиште, кое со средства во висина од 7 милиони и 500 илјади денари го финансира Агенцијата за млади и спорт односно Владата на Република Македонија.

По тој повод денеска во посета на селото Караслари  беа Марјан Спасески директор на Агенцијата за млади и спорт и Славчо Чадиев градоначалник на Општина Велес, кои искажаа задоволство за започнување на градбата на уште еден спортски објект во велешките села, што е посебно значајно за развивање на спортот меѓу младите и населението  во руралните селски населби.

- Со овој проект сакаме да покажеме дека спортот и спортската инфраструктура не се привилегија само на големите градови, туку и во помалите населени места, со цел да се спортува и рекреира,потенцира директорот Спасески.

Селото Караслари, според градоначалникот Чадиев, во овој период доживува еден своевиден инфраструктурен бум. Освен Индустриската зона Караслари, подвлече, правиме повеќенаменско спортско игралиште, а се подготвува и нов фудбалски терен.

Повеќенаменското спортско игралиште во селото Караслари кое треба да биде готово до крајот на август годинава  е дел од проектот на Владата на Република Македонија за изградба на 100 повеќенаменски  игралишта во земјава.

 

Инаку, минатата година повеќенаменско спортско игралиште беше изградено во велешкото село Иванковци.