На карневалот „Бамбурци“ продефилираа 500 маски

По улиците и на селскиот мегдан во Ратево, Беровско денеска во рамките на карневалот „Бамбурци“ продефилираа околу 500 поединечни и групни маски од Македонија, Србија и Бугарија.

- Месната заедница од Ратево и локалната самоуправа од Берово со заеднички напори успеаа локалниот селски обичај да го трансформираат во Малешевски карневал и да го запишаат во календарот на карневали на Македонија, рече претседателот на месната заедница Атанас Валмарски, на завршната свеченост на годинашново издание на карневалот „Бамбурци“.

Гостите и учесниците во програмата ги поздрави и им посака добредојде градоначалникот на Берово Драги Наџински, кој истакна дека општината и Министерството за култура и во наредниот период ќе го помагаат одржувањето на карневалот „Бамбурци„ во Ратево.

Во салата на културниот дом за сите учесници и гости беше приредена заеднича јованденска трпеза, при што на претсатвниците на групите им беа доделени награди и благодарници.

Официјалниот дел од програмата заврши со настап на КУД „Димитар Беровски„ од Берово, а неофицијално карневалската атмосфера продолжува до доцните вечерни часови со јованденска визита (физа) во домовите на ратевци кои го носат името Јован, Ванчо, Иван, Иванка, Јованка, Јованчо и други изведенки. Таму домаќините ги пречекуваат гостите со ракија и вино, баници, зелници, салата од компир и други специјалитети.

- „Бамбурци“ е древен обичај и влече корени од паганството, но со тек на времето се трансформирал и последниве неколку години се одржува на христијанскиот православен празник „Собор на Свети Јован Крстител„ (во Малешевијата попознат како Јованден), објаснува Марин Демировски, член на Организацискиот одбор на Ратевскиот карневал.