Желев: Политиката на Борисов беше погрешна - нема проблем меѓу Македонија и Бугарија

Бугарија го поддржува членството на Македонија во Европската унија, а мнозинството Бугари не се согласуваат со политиката која досега ја водеше доскорешниот бугарски премиер Бојко Борисов, изјавил вчера екс претседателот на Бугарија, Жељу Желев, по предавање во МАНУ на тема „Многуполарен или еднополарен модел на светот во 21 век“.

Според Желев, Борисов со својата политика отворено застанал во поддршка на грчките позиции и дека политиките на блокади место поддршка на интеграциите се само испад на бугарската политика. Се надева дека новата бугарска влада ќе има сосема поинаков пристап кон Македонија.

- Недоразбирањата се едно, а интеграцијата на една држава е нешто сосема друго, вели тој, нагласувајќи дека за него, меѓу Македонија и Бугарија не постои сериозен проблем.

Според Желев, отворените прашања треба да се решаваат, но не со уцени и блокади и не гледа ништо спорно во потпишување на договорот за добрососедство меѓу двете земји.
 
Ставот на Бугарија за македонските евроинтеграции под водство на новиот бугарски премиер Орешарски за првпат ќе може да се процени на претстојниот Европски совет во јуни, но новиот шеф на бугарската дипломатија Вигенин најави дека Софија не се откажува од договорот за добрососедство за кој задолжително смета дека треба да го потипшат двете земји како доказ на добрите билатерални односи.