САД нуди милион долари за пронаоѓање тежок криминалец

САД понуди награда од еден милион долари за секој што ќе им помогне да го пронајдат романскиот кибер-криминалец Николае Попеску.

Наградата ќе биде доделена за секоја информација, со која ќе се овозможи да биде откриен и да се покрене обвинение против Попеску, кој, според истражните органи, веројатно избегал во Европа.

Освен тоа, 750.000 долари се понудени и за секоја информација која ќе доведе до апсење или покренување обвинение против еден од неговите соучесници Димитру Даниел Босогиоиу, кој веројатно ја имал клучната улога во криминалот извршен преку интернет, а организиран од Попеску.

Измамите се состојат од кражба на милиони долари од купувачи по објавување на реклами за скапи стоки, како на пример автомобили, бродови или мотори, а кои всушност не постојат.

Купувачите биле насочувани кон системи за плаќање преку интернет и банкарски сметки, отворени со фалсификувани документи за идентификација.

 Попеску и Босогиоиу се обвинети за измами преку интернет, перење на пари и фалсификување пасоши.