Американски доктор излекуван од ебола!

Американскиот лекар Кент Брантли е излечен од ебола и треба денес да биде отпуштен од болницата "Емри" во Атланта, јави Ројтерс. Тој беше лекуван со експерименталниот лек Zmapp.

Лекарот беше транспортиран со специјален авион за САД на 2 август, откако се зарази со смртоносниот вирус во Либерија. На истиот третман беше подложен и 75-годишниот шпански мисионер, кој беше транспортиран во болница во Мадрид, но не преживеа.

Во моментов лекот Zmapp се применува и на неколку пациенти во Западна Африка. Неговата употреба беше дозволена од Светската здравствена организација како “хумано”, иако помина само тестови врз животни.
Покрај 33-годишниот лекар, на истиот третман беше подложена и 59-годишната Ненси Рајтбол, социјален работник, која исто така работеше со заразени со Ебола во Либерија. Според извештаите од претставници на болницата, таа исто така е оздравена и ќе биде пуштена од здравствената установа.

До денес од Ебола починаа 1350 лица, а над 2000 се заразени, соопшти СЗО.

Во меѓувреме руски научници заедно со странски колеги се надеваат во најскоро време да развијат нов препарат за борба против вирусот Ебола, соопшти рускиот вицепремиер Олга Голодец, цитирана од ИТАР-ТАСС. Подоцна денес за Гвинеја ќе замине осумчлена група од најдобрите вирусолози на Русија, по барање на владата на Гвинеја.