Анкета „Таен клиент": ФЗОМ со најдобар едношалтерски систем - вработените најљубезни

Фондот за здравствено осигурување на Македонија е најдобрата институција во однос на искористувањето на едношалтерскиот систем. Фондот има напредок од две позиции во споредба со 2013 година и има најдобри резултати во однос на добро означените шалтери, љубезност од вработените и од телефонските јавувања на „тајните клиенти“.

Ова го покажуваат резултатите од анкетата за задоволството на граѓаните и од „тајните клиенти“ кои ги ангажираше Министерството за информатичко општество и администрација (МИОА) за 10 подрачни единици и за централата на ФЗОМ, а кои денеска ги презентираше ресорниот министер Иво Ивановски на прес-конференција по средбата со директорот на Фондот, Маја Парнарџиева-Змејкова.

Анкетата за задоволството на граѓаните од државните институции МИОА ја спроведува втора година, според методологијата Барометар на квалитетот на институциите, а првпат годинава е воведен и „таен клиент“ (најмени агенти) кои посетуваат институции и „таен клиент“ преку телефонски јавувања за оценување каков е односот на институциите на телефон.  

Ивановски посочи дека за сите граѓани кои доаѓаат во Фондот, а не поседуваат документи од други државни институции, Фондот преку мерките што ги презел минатата година за електронско поврзување со останатите институции, во истиот момент таму каде е возможно по електронски пат ги добива податоците за граѓаните и со тоа го комплетира барањето без да ги испраќа од една во друга институција.

- Има голем број електронски услуги кои оваа институција ги воведе минатата година кои позитивно ќе влијаат врз резултатите при спроведувањето на „таен клиент“ и барометар на квалитетот на институциите за наредната година. Една од најзначајните услуги кои ќе влијаат врз ова подобрување најверојатно ќе биде промената на матичен лекар кое може да се направи електронски, услуга за која на годишно ниво во Фондот има до 600.000 промени. Тоа значи дека 600.000 граѓани нема да доаѓаат на шалтерите, ниту во подрачните единици и промената може да ја направат преку компјутер или преку својот матичен лекар, рече Ивановски.

Апелираше граѓаните да ги користат овие услуги бидејќи тие како Министерство во соработка со Фондот ќе почнат со активни обуки во сите нивни интернет клубови во Република Македонија за услугите кои ги нуди Фондот. Граѓаните ќе можат да ги посетуваат клубовите и бесплатно да се стекнат со искуство како да се искористат сите електронски услуги. 

- Послаби резултати има во однос на хигиената која се одржува во најголемите и најфреквентните подрачни служби на Фондот во Скопје и во Тетово, во однос на недостиг на формулари и љубезност на некои од вработените во подрачните единици. Најсилни подрачни единици на ФЗОМ се Струга, Охрид и Неготино кои се најдобро почитувани, додека меѓу најслабите се Скопје, Тетово, Гостивар и Кочани, истакна Ивановски.

Минатата година, нагласи, ФЗОМ исто така беше дел од анкетирањето, беа направени голем број активности, предлог мерки, Акциски план кој Владата го разгледа и го донесе за подобрување на состојбата, а најголем дел од тие мерки беа реализирани и тоа се должи на напредокот на ФЗОМ за две позиции споредено со минатата година.

Директорката на Фондот, Маја Парнарџиева-Змејкова рече дека „таен клиент“ е еден од повеќето проекти кои ги има реализирано Министерството за информатичко општество и администрација, а што ним им помага да биде како еден вид водилка во кои сегменти се нивните слабости на кои треба да работат.

- Изминатиот период Фондот работеше на слабости предочени преку „тајниот клиент“ како што се видливо означување на шалтерите, по што сега сме најдобра институција, означување на институцијата, јасно печатење на секој шалтер на нашите обрасци или барања за остварување на правото, а правевме и упатства како тие барања да се пополнат, потенцира директорката на ФЗОМ.

Во врска со нивните напори за дополнително внимание во однос на хигиената во подрачните служби во Скопје и во Тетово, рече дека во една подрачна служба како Скопје тешко е да се оствари совршена хигиена, имајќи предвид дека во неа за одредена потреба дневно влегуваат 6.000 лица.

- Физички тоа не можеше да биде постигнато од страна на нашите капацитети, затоа преземаме активности во два сегмента. За помалите подрачни служби од Македонски шуми ќе имаме преземање на лица со основно образование кои веднаш ќе бидат пренасочени како хигиеничари, а во најголемата подрачната служба Скопје идната недела почнуваме со тендерска постапка за ангажирање фирма која професионално ќе одговара за хигиената, посочи Парнарџиева Змејкова.

Фондот, нагласи таа, е една од најголемите државни институции која комуницира не само со два милиони жители, туку со сите фирми во државата и со сите здравствени установи.

- Годишно имаме 3,2 милиони предмети кои нашите 750 вработени ги работат во рок. Нема предмет во Фондот кој не сработен во законскиот рок од 30 дена. Истовремено и анкетата покажува дека најчесто на шалтер осигурениците завршуваат работа за најмногу 15 минути, што е исто така голем успех. Но, за нас најголем предизвик и бенефит ќе биде користење на системот за електронски услуги, додаде Парнарџиева Змејкова.

Одговарајќи на новинарско прашање рече дека матичните доктори, стоматолозите и гинеколозите најактивно ги користат електронските услуги на Фондот, бидејќи порано годишно околу милион доаѓања од нивна страна имало во таа институција за пријава или одјава на некој пациент од нивната база.

Појасни дека од јули минатата година досега, 605.000 осигуреници електронски направиле пријава кај матичен лекар, а 473.000 само се одјавиле од матичен лекар. 

МИА