Министерот за транспорт, Александар Николоски, на денешното потпишување на договорот со ЕБОР најави целосна трансформација на железничкиот транспорт. Со новиот заем ќе се набават најмалку пет нови електрични локомотиви, кои заедно со постојните ремонтирани возила, ќе го покријат карго-превозот во државата.
Николоски направи споредба на моменталната состојба со онаа од минатата година, нагласувајќи дека бројот на функционални локомотиви е зголемен од нула на над 11. Новата инвестиција е клучна за развојот на Коридорите 10 и 8, но и за проектот за градски воз во Скопје.
„Набавката на овие пет нови електрични локомотиви ќе има суштинско значење за зголемување на карго-транспортот. Кога целиот проект ќе биде завршен, по тие линии ќе сообраќаат исклучиво електрични возови, со јасна цел – целосно да се елиминира употребата на дизел локомотиви во главниот град и да се придонесе за подобар квалитет на воздухот“, рече Николоски.
Покрај инфраструктурното зајакнување, министерката Димитриеска-Кочоска нагласи дека овој договор е потврда за довербата на меѓународните финансиски институции во македонските политики. Настанот беше заокружен со присуство на претставници од раководството на ЖРСМ Транспорт и делегација на ЕБОР.