Независна Угостителска Комора: Воведувањето на новата даночна стапка нема сите угостители рамноправно да ја почувствуваат

Владата со четвртиот сет мерки делумно го спроведе ветувањето за смалување и воведување на линеарен данок на додадена вредност во угостителската индустрија и наместо угостителите од 1  јануари 2021 година да бидат сите рамноправни и имаат една нова повластена даночна стапка на сите свои услуги во висина од 10% истата се применува и важи исклучиво за услуги на предавање на храна и на пијалаци за консумација на лице место и кетеринг услуги, со исклучок на алкохолни пијалаци, велат од Независната угостителска комора.

„Со предизборните кампања на угостителите им беше ветено унифицирање на данокот на додадена вредност со една единствена даночна стапка од 10% ДДВ за сите ресторантски услуги. За жал Владата истата ја спроведе со парцијално решение на воведување на данок на додадена вредност во висина од 10% исклучиво за услуги на предавање на храна и на пијалаци за консумација на лице место и кетеринг услуги, со исклучок на алкохолни пијалаци. Со воведување на новата повластена стапка останаа во важност претходно важечките стапки во висина од 5% и 18% со што од 1 јануари во угостителската индустрија постојат 3 стапки на ДДВ и тоа 5%, 10% и 18% што на некој начин со почетокот на новата 2021 година создаде хаос во работењето.

Воведувањето на новата даночна стапка во угостителството нема сите угостители рамноправно да ја осетат. Рестораните, гостилниците, националните ресторани и сите оние кој работат со храна кои ќе имаат поголем бенефит од кафетериите, баровите, пивниците, ноќните клубови и дискотеките кои работат само со пијалоци. Краткорочни и брзи позитивни ефекти со воведувањето на новата стапка нема да има ниту пак битно влијание во работењето или брзото заздравување на угостителската индустрија од пандемијата ковид-19. Долгорочно гледано бенефитите и покрај тоа што не е во целост применета новата стапка од 10% на сите угостителски услуги ќе има позитивен ефект во законското работење на угостителите“, велат од Комората.

Од таму велат дека хаосот е поголем и поради ПРАВИЛНИКОТ направен од Министерството за финансии за начинот на воведување на новата стапка на ДДВ во висина од 10% кој е објавен во Службен весник бр. 315 еден ден пред почетокот на неговата примена на 30 декември 2020 година што остава многу кратот рок на прилагодување на ПОС системите кај угостителите и користење на новата повластена даночна стапка.

„Со новата даночна стапка се појавува и понатаму проблемот и можноста за различно толкување и правото на користење на двете повластени стапки од 5% и 10% во еден ист објект кои се употребуваат за достава на храна со 5% ДДВ и предавање на храна и на пијалаци за консумација на лице место и кетеринг услуги со 10% ДДВ.

Поради пандемијата ковид-19 голем број угостителските објекти воведоа во своето работење достава на храна. Угостителите кои покрај предавањето на храна на лице место и кетеринг услуги ќе сакаат да продолжат да работат со достава на храна и примена на повластената даночна стапка од 5% ќе треба да регистрираат посебни подружници во своите објекти со посебни фискални апарати преку кои ќе го остварат правото на користење на оваа повластена даночна стапка како би се избегнеле можноста за манипулација и повторна злоупотреба на правото на користење и толкување на даночната политика и од страна на угостителите и од страна на даночните инспектори“, велат од Независната угостителска комора.

Независната угостителска комора ќе се заложи во наредниот период што побрзо Владата да го доисполни своето изборно ветување за една даночна стапка за сите угостителски објекти.