Краткото, но интензивно невреме проследено со силни громови и електрични празнења предизвика серија пожари и технички дефекти во струмичкиот регион.
Поради силината на ударите, повеќе противпожарни тимови беа истовремено распоредени на терен во неколку населени места каде што штетите беа најголеми.
Молњите и настанатите куси споеви буквално запалија електрични столбови и кабли во селата Моноспитово, Куклиш и Горни Балдовци, оставајќи делови во дефект.
Во самиот град Струмица, поточно на улицата „Климент Охридски“, силниот електричен бран доведе до палење на приватно електрично броило.
Најсериозната закана се појави кај селото Дорломбос, каде силните молњи предизвикаа шумски пожар на исклучително тешко пристапен терен.
Во исто време, силниот ветер корнеше дрвја, при што една екипа мораше итно да интервенира во селото Банско за да отстрани паднато дрво кое целосно го блокираше патот.
- „Краткото, но интензивно невреме кое го зафати струмичкиот регион предизвика серија технички дефекти и пожари на отворено, што наложи итна и масовна интервенција на Територијалната противпожарна единица (ТППЕ) Струмица. Со брзата интервенција беше спречено понатамошно ширење на огнот и беше избегната поголема материјална штета како на приватните објекти, така и на шумскиот фонд во регионот“, соопштуваат од ТППЕ Струмица.