Сведочењето на Марија Петрушева во случајот со пожарот во Кочани понуди нови докази за хаосот и пренатрупаноста во дискотеката „Пулс“. Според нејзиниот исказ, иако нејзиниот син Андреј бил уморен, тој морал да се појави на работа во еден часот по полноќ по инсистирање на сопственикот поради големиот број посетители.
Петрушева ги опиша „сцените од пеколот“ пред објектот каде со сопругот ги барале своите деца. Додека сопругот влегувал во чадот, таа ги проверувала децата кои лежеле надвор.
„Јас се наведнав да ги обрќам децата, да видам дали е некој од нив. Тие деца кои ги гледав таму, не сфаќав дека се мртви… мислев дека се онесвестени од чадот“, раскажа таа.
Овој дел од сведочењето предизвика силни емоции во судницата, при што еден од присутните родители во публиката беше принуден да ја напушти просторијата. Петрушева нагласи дека информацијата дека нејзиниот син имал „слаб пулс“ при транспортот во болница била последната надеж која подоцна згаснала. Овој исказ директно ги поткрепува тврдењата на обвинителството дека објектот работел со капацитет многу поголем од дозволениот.