Во синоќешните руски воздушни напади врз украинскиот град Днепар и регионот Синелникове загинаа две лица, а беше предизвикан и пожар кој зафати приватни објекти, домови, петкатна зграда, гасовод и повеќе автомобили.
Украинската противвоздушна одбрана соопшти на Телеграм дека во текот на ноќта пресретнала и уништила „две балистички ракети ‘Кинџал’ и 91 беспилотно летало“. Според истите информации, една ракета и 41 дрон погодиле цели во 13 различни места во Украина.
Во исто време, руското Министерство за одбрана објави дека синоќа биле пресретнати и уништени 64 украински дронови. Според нивните податоци, „дваесет и пет украински беспилотни летала биле пресретнати над Рјазанската област, 17 над Ростовскиот регион, осум над Тамбовскиот регион, пет над Воронежскиот регион, по два над Белгородскиот, Саратовскиот и Липецкиот регион, и по еден над Тулскиот и Самарскиот регион, како и над Република Татарстан“.
Двете страни изнесуваат свои бројки за пресретнатите воздушни цели, додека украинските региони продолжуваат да се соочуваат со последици од нападите.