Глобалната суша и климатските промени може да бидат клучната причина за ширењето на хантавирусот, предупредуваат аргентинските научници по смртните случаи на крузерот „MV Hondius“. Биологот Раул Гонзалез Итиг смета дека зголемувањето на инфекциите е тесно поврзано со промените во однесувањето на глодарите.
„Глобалните климатски промени менуваат сè, а ова може да доведе и до појава на случаи на хантавирус на места каде што претходно не се случиле“, изјави Итиг за „The Guardian“. Тој појаснува дека по екстремните суши во 2023 и 2024 година, зголемените врнежи создале повеќе храна за животните, што го зголемило нивниот број.
Вирусот привлече внимание бидејќи на крузерот е потврден „андскиот сој“, единствениот за кој е документирано дека се пренесува од човек на човек. Сепак, СЗО и локалните експерти смируваат дека Аргентина не се соочува со ништо непознато.
„Аргентина е навикната да се справува со хантавирусот“, вели Роберто Дебаг, специјалист за заразни болести, нагласувајќи дека земјата со децении има систем за задолжително пријавување на заразата.
Од јули минатата година, Аргентина регистрираше 101 случај на хантавирус, од кои 32 завршија фатално. Иако бројките се повисоки од претходната година, тие се во рамките на годишниот просек. СЗО нагласува дека ризикот за општата популација е „апсолутно низок“.
Аргентинските власти во моментов истражуваат каде точно се заразиле патниците. Се планира фаќање на глодари за анализа по рутата по која се движел парот кој прв развил симптоми, иако во регионот од каде тргнал бродот не е забележан случај цели 30 години.