Русија сноси целосна одговорност за упадите во воздушниот простор на земјите членки на НАТО, кои зачестуваат, претставуваат ризик од погрешна проценка и загрозуваат животи, па затоа тие мора да престанат, порача денеска Северноатлантскиот совет по состанокот на ниво на амбасадори на земјите членки на Алијансата во Брисел.
Состанокот беше одржан претпладнево на барање на Естонија поради нарушувањето на естонскиот воздушен простор од страна на три руски борбени авиони на 19 септември.
– Овој упад е дел од поширок модел на се понеодговорното руско однесување. Ова е втор пат за две недели Северноатлантскиот совет да одржува консултации, по големото нарушување на полскиот воздушен простор од страна на руски дронови. Неколку други сојузници, меѓу кои и Летонија, Литванија, Норвешка, Романија и Финска, исто така неодамна доживеаја повреди на воздушниот простор од страна на Русија. Изразуваме целосна солидарност со сите сојузници, чиј воздушен простор е нарушен, се наведува во изјавата на Северноатлантскиот совет.
На состанокот врховниот командант на сојузничките сили за Европа, генералот Алексус Гринкевич ги информирал амбасадорите за упадот на руските ловци Миг-31 во естонскиот воздушен простор и за „брзиот и решителен“ одговорот на НАТО со испраќања на авиони да ги пресретнат леталата и да ги придружуваат додека се наоѓале над територијата на Естонија.
– Одговорот на НАТО на неодговорните постапки на Русија ќе продолжи да биде робустен. На 12 септември, ја лансиравме иницијативата „Источната стража“ за да ја зајакнеме позицијата на НАТО на целото источно крило. Ќе ги засилиме нашите капацитети и ќе го зајакнеме нашето одвраќање и одбранбена позиција, вклучително и преку ефикасна противвоздушна одбрана, се наведува во изјавата.
Северноатлантскиот совет порачува и дека Русија не треба да има сомнежи дека сојузниците од НАТО ќе ги користат сите потребни воени и невоени алатки во согласност со меѓународното право, за да се одбранат и да ги одвратат заканите од сите страни.
– Ќе продолжиме да одговараме на начин, време и домен по наш избор. Овие и други неодговорни постапки на Русија нема да ги обесхрабрат сојузниците во нивните трајни обврски за поддршка на Украина, чија безбедност придонесува и за нашата, како и во остварувањето на нејзиното вродено право на самоодбрана против бруталната и неиспровоцирана руска агресивна војна, се додава во изјавата на Северноатлантскиот совет.