Товарен брод во грчка сопственост, што се движел кон Грција, бил цел на напад во близина на Ормузскиот теснец, потврди министерот за надворешни работи на Грција, Јоргос Герапетритис.
Во изјава за CNN, шефот на грчката дипломатија го потврди нападот, но истакна дека засега нема официјална потврда дали бродот, кој плови под либериско знаме, е запленет од страна на иранските сили. Герапетритис ја опиша ситуацијата како „прилично вознемирувачка“ и презеде итни мерки.
„Испративме општо известување до сите бродови во грчка сопственост да бидат многу внимателни, да покажат максимална воздржаност и да избегнуваат преминување на теснецот“, порача Герапетритис.
Според информациите на иранските медиуми, овој брод бил еден од вкупно трите кои биле цел на иранскиот Корпус на револуционерна гарда (ИРГЦ). Додека за грчкиот брод сè уште не е потврдена заплена, ИРГЦ соопшти дека останатите два брода се запленети и префрлени во ирански води.
Ситуацијата во еден од најважните светски водни патишта останува тензична, а Атина внимателно ја следи состојбата и ги повика сите пловила под нејзино знаме или сопственост да ги избегнуваат овие зони до дополнително известување.