Во март годинава значително е намален бројот на граѓаните и правните лица кои не ја прифаќаат одговорноста за сторени сообраќајни прекршоци и поднесуваат приговор до надлежниот суд преку системот „Безбеден град“, информираат од Основниот кривичен суд Скопје.
Во март 2026 година до судот се поднесени вкупно 65 приговори – 43 од физички лица и 22 од правни лица, додека во февруари бројот на приговори бил 476 (45 од физички и 431 од правни лица). Од доставените приговори во март, со пресуда веќе се завршени 92 предмети.
Судиите од Одделот за прекршоци, вкупно 16, постапуваат по овие предмети, при што сите приговори се заведуваат и согласно Законот за прекршоци, во рок од 8 дена се доставуваат до Министерството за внатрешни работи за произнесување – неопходен предуслов за понатамошно постапување.
Преку системот „Безбеден град“ во март констатирани се 26.241 сообраќаен прекршок, што е зголемување во однос на февруари кога се регистрирани 19.066 прекршоци. Од вкупниот број, најмногу се прекршоци за управување возило со брзина поголема од дозволената – 25.230, следат 941 прекршок за управување со возило со измината важност на сообраќајната дозвола, додека прекршоците за минување на затворен сигнал (црвено светло) се намалени за 68,2% и изнесуваат 70 случаи.
МВР информира дека во периодот од 1 до 31 март преку камерите поставени на градските и коридорските патишта, регистрирани се сите наведени прекршоци.