Вистински потоп и енормна количина на воден талог од дури 74 литри на квадратен метар наврна во изминатите 12 часа во скопското село Црешево, кое беше најпогодено од невремето.
Веднаш по него, според официјалните мерења, најкритично било во Општина Гази Баба каде се регистрирани 44 литри, по што следат Крива Паланка со 29 и Берово со 22 литри дожд.
Огромни количини вода паднаа и во Струмица и на Зајчев Рид каде се измерени по 18 литри, додека во Карпош се регистрирани 13 литри на метар квадратен.
Метеоролозите појаснуваат дека поради изразената локалност на овие атмосферски процеси, паднатата количина воден талог варира и на некои места штетите и дождот се многу поголеми од официјално измерените.
За среќа, до крајот на денот облачноста во државата драстично ќе се намали, со што во текот на ноќта ќе преовладува стабилно и претежно ведро време без нови врнежи.
- „Најмногу дож – 74 литри на квадратен метар во изминатите 12 часа наврна во скопско Црешево, по што следат Гази Баба со 44 литри, Крива Паланка со 29 и Берово со 22 литри на квадратен метар, покажуваат резултатите од мерењата направени од Управата за хидрометеоролошки работи (УХМР). Од Управата посочуваат дека дадените вредности за количината на врнежи се измерени на дождомерните места на УХМР, а поради локалноста на процесите, паднатата количина воден талог многу варира и на различни места може да е многу поголема од измерената“, соопштија од УХМР.