Нови напади на израелските сили врз јужниот дел на Либан резултираа со најмалку 12 загинати лица, меѓу кои и едно дете. Според официјалните податоци од либанското Министерство за здравство, во нападите се повредени уште 25 лица.
Израелската армија потврди дека извршила напади, наведувајќи дека тие биле одговор на претходни дејствија на Хезболах. Од Тел Авив соопштија дека милитантната група лансирала неколку дронови кон израелски војници стационирани во јужен Либан, а била пресретната и ракета насочена кон област каде што дејствуваат нивните сили.
Иако е на сила формално примирје, судирите на теренот меѓу Израел и Хезболах не запираат и се случуваат речиси секојдневно. Тензиите дополнително се заострија по ескалацијата на конфликтот со Иран.
Примирјето беше официјално објавено во средината на април, по разговорите што беа водени со посредство на американскиот претседател Доналд Трамп.