Цените на нафтата продолжија да се намалуваат трет ден по ред, додека пад е забележан и кај златото, во услови на нови дипломатски сигнали од Блискиот Исток и исчекување на американските податоци за инфлацијата.
Цената на брент нафтата денеска се намали за повеќе од два долари и се движи околу 86 долари за барел, додека американската WTI нафта падна на околу 80 долари за барел. Тоа се најниските нивоа во последните две недели.
Падот следува по обновувањето на разговорите меѓу Иран и Оман, кои ги зголемија очекувањата дека би можело да дојде до нормализирање на пловидбата низ Ормускиот Теснец, една од клучните светски рути за транспорт на нафта и природен гас.
Според информациите од пазарите, се разгледува можноста за воспоставување привремен безбеден коридор за бродовите и расчистување на мини, што би го олеснило транспортот на енергенсите. Дополнителен притисок врз цената создава и растот на американските резерви на нафта за 4,2 милиони барели, повеќе од очекувањата на аналитичарите.
Истовремено, по претходниот силен раст, се намали и цената на златото. Спот-цената падна за околу 0,9 проценти, на приближно 4.617 долари за унца, откако претходно достигна тримесечен максимум.
Инвеститорите сега ги очекуваат новите податоци за инфлацијата во САД, кои може да дадат дополнителни сигнали за идната политика на американската централна банка и движењето на каматните стапки.
Падот на светската цена на нафтата, сепак, не значи автоматско намалување на цените на горивата во Македонија. Домашните цени зависат од пресметката на Регулаторната комисија за енергетика, референтните цени на нафтените деривати и курсот на доларот.