Нивната работа е далеку од очите на јавноста, но без нив полицијата би била „глува и слепа“. Вака министерот Панче Тошковски ја опиша важноста на Одделот за информатика и телекомуникации, чии припадници ги посети денеска на самиот врв на Јакупица – Солунска Глава.
„Тие се грижат комуникациските и информациските системи на МВР да бидат стабилни 24 часа, секој ден од годината. Без стабилна комуникација, полицијата не може да координира, да реагира навреме ниту ефикасно да ја извршува својата улога“, порача министерот.
Тошковски нагласи дека оваа тивка и високо одговорна работа е еден од темелите на безбедноста на државата и им се заблагодари на колегите што професионално и без пауза ја носат оваа одговорност дури и за време на најголемите празници.