Министерството за здравство соопшти дека внимателно го следи случајот со 19-годишната пациентка Станка Михајлова од село Баница, која по царски рез направен во Клиничката болница во Штип останала парализирана.
Со цел целосно утврдување на сите околности, Министерството за здравство веќе издаде налог за спроведување вонреден инспекциски надзор.
„Со цел целосно, објективно и стручно утврдување на сите околности поврзани со лекувањето на пациентката, Министерството издаде налог до Државниот санитарен и здравствен инспекторат да изврши вонреден инспекциски надзор. По добивањето на инспекцискиот наод и целокупната медицинска документација, Министерството ќе иницира и стручен надзор над досегашниот тек на лекувањето и постапувањето на здравствените работници и установи вклучени во случајот“, стои во соопштението од Министерството за здравство.
Од ресорното министерство апелираат до јавноста да не се изнесуваат предвремени заклучоци сè додека траат постапките.
„За утврдената фактичка состојба и за евентуалните натамошни мерки, јавноста ќе биде навремено и транспарентно информирана“, велат од Министерството.
Министерот за здравство Сашо Клековски во изјава за „Слободен печат“ потврди дека вонредниот надзор ќе ги опфати сите три болници во кои се лекувала младата родилка.
Покрај тоа, Клековски најави и стручен надзор во кој експерти од гинекологија, неврологија и урологија ќе испитуваат дали има лекарска грешка.
Случајот се однесува на 19-годишната пациентка кај која по вториот изведен царски рез во Штипската општа болница настапила параплегија, односно губење на функцијата на нозете.