Министерот за надворешни работи и надворешна трговија, Тимчо Муцунски, денеска престојуваше во еднодневна официјална посета на Киев, Украина, на покана на украинскиот министер за надворешни работи, Андриј Сибиха.
Во рамките на посетата, за која Муцунски посочи дека патувал повеќе од 20 часа со авион, воз и автомобил, беа одржани билатерални разговори за соработката и безбедносните предизвици.
„Разговаравме за натамошно продлабочување на политичкиот дијалог и билатералната соработка, европската перспектива и актуелните безбедносни предизвици. Ја потврдив нашата цврста и континуирана поддршка за Украина и за принципите на суверенитет, територијален интегритет и меѓународно право“, изјави Муцунски.
Тој ја подвлече поддршката за суверенитетот и територијалниот интегритет на Украина, посочувајќи дека границите не смеат да се менуваат со сила.
„Стоиме со Украина. Украина е суверена држава. Нејзиниот територијален интегритет мора да се почитува. Границите не можат да се менуваат со сила“, истакна тој.
Муцунски порача дека за стигнување до траен мир е потребна заедничка акција на меѓународните партнери, а ја најави и поддршката за идниот процес на реконструкција.
„Безбедноста на Украина е европска безбедност. Американското лидерство и европската одговорност мора да дејствуваат заедно за да се создадат услови за праведен и траен мир. Нашата поддршка ќе продолжи, а кога ќе дојде времето за обнова, сакаме да бидеме тука не само како пријател, туку и како партнер во закрепнувањето и реконструкцијата на Украина“, рече Муцунски.