Министерот за надворешни работи и надворешна трговија Тимчо Муцунски, во рамки на работната посета на Ирска, се обрати во Институтот за меѓународни и европски работи (IIEA), каде што говореше за европската интеграција, политиката на проширување на Европската Унија и иднината на Западен Балкан.
Тој истакна дека проширувањето мора да остане процес заснован на заслуги, јасни правила и објективни критериуми, нагласувајќи дека кредибилитетот на Европската Унија зависи од доследноста кон принципите и ветувањата врз кои е изградена.
Муцунски посочи дека е потребна нова политичка енергија во процесот на проширување, особено во услови на засилени геополитички предизвици, при што Западниот Балкан, како што рече, не смее да остане на маргините, туку треба да биде дел од европската визија за безбедност, стабилност и просперитет.
Тој ја поздрави континуираната и принципиелна поддршка од Ирска за политиката на проширување и европската перспектива на регионот, додавајќи дека европската интеграција останува стратешка определба на земјата и дека полноправното членство во ЕУ е јасна и непроменета цел.