Македонија се соочува со непринципиелен застој во евроинтеграциите, што носи негативни последици за двете држави, порача денеска од Софија министерот за надворешни работи и надворешна трговија, Тимчо Муцунски. Тој претпладнево учествуваше на министерскиот состанок на Процесот за соработка во ЈИЕ (ПСЈИЕ), а попладнево е дел од државната делегација предводена од претседателката Гордана Сиљановска-Давкова.
Шефот на дипломатијата потенцираше дека од моменталната ситуација економски и политички губат и Македонија и Бугарија, поради што е потребно да се надмине високиот степен на недоверба.
- Ние сме заложник на една некоректна и непринципиелна блокада на нашиот европски пат и тоа е она што сакаме да им го објасниме на нашите колеги во Бугарија. Никој нема интерес од ова што се случува во моментот. Губат двете држави економски, политички, губат и граѓаните, народите на двете држави, кога се создава ваков тип на недоверба – истакна Муцунски.
Како клуч за излез од оваа ситуација, министерот го посочи отворањето на преговарачкиот процес за земјава, но подвлече дека постојат теми кои за македонската Влада се затворени.
- И најлесниот начин на којшто ние можеме да се движиме напред и да ги решаваме нашите меѓусебни прашања е доколку Бугарија ги отвори вратите и дозволи ние да ги отпочнеме преговорите и да знаеме дека сите предизвици може да се решат, но да бидат принципиелни предизвици. А за прашања, ќе повторам, поврзани со историја, идентитет и јазик, оваа Влада не е подготвена ниту да преговара, ниту да разговара за нив – рече Муцунски.
Според него, историјата и јазикот се автохтони прашања кои не припаѓаат во европскиот процес, туку фокусот мора да биде ставен на заедничката иднина во ЕУ. Тој најави дека разговорите ќе продолжат на претстојните мултилатерални средби, вклучително и на Самитот на НАТО.
Во однос на евроинтегративниот пат на регионот, Муцунски истакна дека Македонија ги исполнува сите критериуми и има целосно усогласена безбедносна политика со Унијата.
- Дефинитивно и тоа е нашата јасна позиција. Прво, тоа што е апсолутно јасно и тоа го кажувам особено по самитот во Тиват е дека постои огромен прозорец којшто се отвора од страна на Европската Унија насочена кон регионот на Западен Балкан. Но, исто така, тоа што ние постојано го повторуваме е дека тој прозорец во преден план треба да ги стави земјите коишто ги исполнуваат реформите поврзани со европските критериуми, но и земјите коишто имаат целосна усогласена заедничка надворешна и безбедносна политика со Европската Унија – изјави тој.
Муцунски заклучи дека земјава претставува модел кој ги спроведува реформите на дело и делува како кредибилен и предвидлив партнер на меѓународната сцена.