Министерот за надворешни работи и надворешна трговија Тимчо Муцунски денеска и утре ќе учествува на 21. Бледски стратешки форум во Словенија, каде што ќе говори за актуелните геополитички случувања и нивното влијание врз Централна и Југоисточна Европа.
Муцунски ќе биде панелист на дискусијата „Геополитички превирања: Централна и Југоисточна Европа во свет на коридори, безбедност и проширување“. Во фокусот на панелот ќе бидат промените во геополитичкиот пејзаж и процесите што ги менуваат меѓународните односи.
Овогодишното издание на форумот се одржува под мотото „Моќта да ја обликуваме иднината“.
Во рамки на посетата, Муцунски ќе учествува и на работен појадок со министрите за надворешни работи од регионот, на кој ќе се разговара за актуелните состојби и предизвиците со кои се соочува Западен Балкан.
Предвидени се и повеќе билатерални средби на маргините на форумот, со министри за надворешни работи, претставници на меѓународни организации и други учесници и гости на настанот.