Министерот за надворешни работи и надворешна трговија, Тимчо Муцунски, се осврна на одлуките донесени на Самитот на НАТО во Анкара, оценувајќи дека тие претставуваат чекор кон посилна Алијанса и поголема колективна безбедност.
„Пораката е јасна: НАТО испорачува резултати. Ја потврдивме заедничката определба за поголеми инвестиции во одбраната, понатамошно јакнење на одбранбените капацитети, поправедна распределба на одговорностите меѓу сојузниците и континуирана поддршка за Украина“, напиша Муцунски на социјалните мрежи.
Тој посочи дека во рамки на Самитот имал повеќе билатерални средби со министри од земји членки на НАТО, како и со претставници на сојузнички и партнерски држави.
Според Муцунски, на разговорите биле опфатени билатералните односи, соработката во рамките на Алијансата, но и актуелните регионални и глобални безбедносни прашања.
„Како посветен и кредибилен сојузник, продолжуваме активно да придонесуваме кон зајакнувањето на колективната безбедност, стабилноста и единството“, порача министерот.