Македонија има потенцијал да стане важна влезна точка кон Европа за израелските туристи, компании и инвеститори, оценил министерот за надворешни работи и надворешна трговија Тимчо Муцунски во интервју за израелскиот весник „The Jerusalem Post“, дадено за време на неговата прва посета на Израел како министер.
Муцунски открил дека една од темите за кои се разговарало е воспоставување директна авиолинија меѓу Израел и Македонија.
„Една од првите теми за кои разговаравме беше можноста за воспоставување директна авиолинија меѓу Тел Авив и Скопје или Тел Авив и Охрид, кој е нашиот главен туристички центар и град за кој верувам дека секој Израелец би сакал да го посети“, изјавил Муцунски.
Според него, директното авионско поврзување би можело да ја зголеми туристичката размена, но и да ги олесни деловните контакти и економската соработка меѓу двете земји.
Муцунски потенцирал дека амбициите не се ограничуваат само на туризмот. Стратешката положба на земјава на Коридорите VIII и X, како и инвестициите во енергетската поврзаност, според него создаваат услови Северна Македонија да биде основа од која израелските компании полесно би настапувале на европскиот пазар.
„Сакаме да бидеме порта кон Европа не само за израелските туристи, туку и за израелските компании. Можеме да бидеме и влезна точка за израелските инвеститори кон европски пазар чиј потенцијал сè уште не е целосно искористен од израелската бизнис-заедница, но и пазар за извоз“, изјавил министерот.
Како области со потенцијал за продлабочување на соработката ги посочил земјоделството, управувањето со водите, безбедноста, иновациите, здравството, образованието, туризмот, инвестициите и одбранбената индустрија.
Муцунски нагласил дека Владата има намера добрите политички односи со Израел да ги преточи во поконкретна економска и институционална соработка.
„Од формирањето на Владата, билатералните односи со Израел ги поставивме како еден од приоритетите на нашата надворешна политика“, истакнал тој.
Во интервјуто била посочена и засилената динамика на контакти меѓу двете земји, меѓу кои и посетата на парламентарна делегација предводена од пратеничката Рашела Мизрахи, која во јануари имала средби со претседателот на Кнесетот, Амир Охана, и со други израелски претставници.
Муцунски оценил дека неговата посета на Израел треба да придонесе за дополнително зајакнување на економските врски, туристичката размена и инвестициите меѓу двете земји.