Се бара решение за иднината на 550-те вработени во подружницата на руската компанија „Лукоил“ во Македонија, откако енергетскиот гигант донесе одлука да го продаде имотот во странство поради санкциите што ги воведе САД за рускиот нафтен сектор.
Претседателот на Регулаторната комисија за енергетика, Марко Бислимоски, денеска изјави дека на „Лукоил Македонија“ треба да ѝ се даде можност да продолжи со работа и да обезбедува нафтени деривати од други извори, надвор од Русија.
– Имав средба со претставникот на „Лукоил Македонија“ и тој ме увери дека ќе ги преземат сите потребни мерки за вработените да не останат без работа. Компанијата може и понатаму да функционира и да обезбедува нафтени деривати. Досега најголемиот дел ги набавувале од Бугарија, но можат да обезбедуваат и од други земји, така што треба да им дадеме шанса да продолжат со работа – изјави Бислимоски.
„Лукоил Македонија“ моментално располага со 40 бензински пумпи и 10 складишта за гориво со вкупен капацитет од 8.320 кубни метри.