Судскиот процес за катастрофалниот пожар во кочанската дискотека „Пулс“, што се случи минатата година, денеска влезе во својата најтешка фаза. Во судницата во КПУ „Идризово“ беа презентирани над 60 обдукциски наоди кои ја открија страшната вистина за последните моменти на настраданите, меѓу кои доминираат млади луѓе на возраст од 16 до 25 години.
Вештачењата недвосмислено потврдија дека сите жртви настрадале од насилна смрт. Најголем број од нив, над 50 лица, починале од интоксикација (труење) со јаглерод моноксид, откако густиот и отровен чад за кратко време го исполнил просторот на дискотеката.
Меѓу имињата на жртвите на кои им се прекинати животите на овој начин беа прочитани Јорданчо Џамов (31), Иван Трајчев (24), Џоко Ѓорѓиев (24), Ивана Антова (21), Павел Христовски (20), Драгана Минова (16), Филип Ивановски (16), Димитар Иванов (16), Леонид Велков (17), Надуца Наунова (17), Сара Јорданов (17), Матеј Марковски (18) и многу други.
Обдукциите открија и дека хаосот и паниката што настанале при обидот за бегство довеле до трагичен крај за четворица млади луѓе, кои починале од компресија (згмечување во толпа): Стефанија Алексова (19), Диме Димитриев (31), Сара Алексова (21) и Моника Спасова (26). Кај дел од жртвите, пак, како причина за смртта е наведен апсолутен недостаток на кислород, додека кај Ѓорѓи Величков е утврдено термичко оштетување на дишните патишта.
На крајот на рочиштето беа презентирани и извештаите за Александар Глигоровски (29) и Стојанче Стефанов (24), кои им подлегнаа на повредите додека се лекувале во странство. Денешното рочиште беше исполнето со тешка емотивна атмосфера, соочувајќи ја јавноста со суровата реалност на една од најголемите трагедии во историјата на земјата.