Митовски: Крива Река е неупотреблива и сериозно загадена, анализата на риболовното друштво "Мрена" покажува уште поголемо загадување

Врз основа на анализата направена од Институтот за јавно здравје на барање на риболовното друштво „Мрена“ од Крива Паланка, водата во реката Крива Река е сериозно загадена и спаѓа во најлошата категорија на загадени води, неупотреблива за било која намена, изјави на денешната прес-конференција градоначалникот на Крива Паланка, Сашко Митовски.

Врз основа на стручното мислење површинската вода спаѓа во V класа согласно Уредбата за класификација на водите заради зголемената содржина на олово (36,65 микрограми на литар во однос на максимална вредност 10 микрограми на литар), рече Митовски.

„Оваа класа на вода по Уредбата, е многу загадена, хипертрофична вода, која во природна состојба НЕ МОЖЕ да се употребува за ниедна намена. Водата е без пуферен капацитет и нејзината киселост е штетна за многу видови на риби.

Концентрацијата на штетни супстанции ги надминува акутните нивоа на токсичност за водениот свет. Вода од оваа класификација (класа 5) не смее да се користи за ништо па ни за наводнување“, посочи Митовски.

Митовски дополнително додаде дека врз основа на стручното мислење поради загадувањето од со манган (188,242 микрограми наспроти дозволено 50 микрограми), цинк (113,187 микрограми наспроти 100 микрограми од дозволените ) и кадмуим (2,158 микрограми наспроти 0,1 микрограми од дозволените ) на литар спаѓа во III класа од Уредбата за класификација на водите заради енормното загадување со горенаведените соединенија. Кадмиумот е најмногу зголемен.

„А пак според овие параметри оваа вода припаѓа во 3 класа, по Уредбата и истата може да се употребува за друга намена само по соодветнаобработка.

Од физичките показатели при анализата на водата на Крива Река матноста е во 170 единици од дозволени максимум 10 гранични вредности

Додека пак хемиските показатели на суспендираните материи (кои се присутни во водата кои што ја намалуваат пропустливоста на светлината во природната вода со што влијаат и врз животната средина и ги уништуваат водните организми, а се главен причинител за поморот на живиот свет) со со врeдност дури 7876 микрограми на литар од максимално дозволени 30 микрограми на литар или за повеќе од 120 пати од дозволеното“, истакна Митовски.

Градоначалникот на Крива Паланка нагласи дека сите овие суспендирани материи кои што се од органско и неорганско потекло многу тешко се раствараат во вовадата, а се практично показател и за присуството на тешките метали во водата на Крива Река.

„Согласно овие резултати и резултатите од анализата направена побарање на општина Крива Паланка од страна на акредитирана лабораторија водата во Крива Река е неупотреблива и сериозно загадена.

Двете истражувања патем, кои се независни и направени о акредитирани лабаратории, односно од една акредитирана лабораторија и државниот Институт за јавно здравје.

Оттука нејасно е како од Булмак 2016 тврдат дека загадувањето не е од истекувањето и хаваријата на цевката во рудникот „Тораница“. Имено, согласно А еколошката лиценца која ја поседува „Булмак 2016“ и рудникот Тораница во нивниот процес се користи токму кадмиум, цинк, олово, цијанид и останати соединенија кои се наоѓаат во Крива Река по хаваријата и тоа се гледа во две независни анализи на водите. 

Уште еднаш апелираме до надлежните институции да реагираат соодветно, итно и без задршка. 

Апелираме Јавното обвинителство да отвори постапка согласно кривичната пријава која ја поднесовме минатата недела“, посочи Митовски.