Министерот за животна средина и просторно планирање Муамет Хоџа побара целосно расчистување на случајот со загадувањето на водоводната мрежа во Гостивар и утврдување одговорност за сите кои со своето дејствување или непостапување придонеле за состојбата.
„Ова е сериозен инцидент кој директно го загрози здравјето на илјадници граѓани. Очекувам целосно да се утврдат сите факти и околности, како и кривична и морална одговорност за сите инволвирани. Кога е загрозено здравјето на граѓаните, не смее да има компромиси ниту прикривање на одговорноста“, изјави Хоџа на прес-конференција во Владата.
Тој посочи дека надлежните институции будно го следат развојот на ситуацијата и изрази загриженост за граѓаните од Полошкиот регион кои имаат здравствени последици поради случајот.
Хоџа нагласи дека снабдувањето со вода за пиење, одржувањето на водоводните системи, како и собирањето и третманот на отпадните води се во надлежност на општините и јавните комунални претпријатија. Според него, локалните власти се првата линија на одговорност за безбедното функционирање на овие системи и за заштитата на санитарните зони околу водните извори.
Министерот увери дека Владата ги презема сите мерки во рамки на своите надлежности и ќе продолжи да постапува сè до целосно расчистување на случајот. Тој посочи дека контролата на квалитетот на водата за пиење е законска обврска и на Центрите за јавно здравје, кои треба континуирано да ја следат исправноста на водата и навремено да ги информираат јавноста и институциите при ризик по здравјето.
Хоџа додаде дека во земјава се спроведува голем инвестициски циклус за подобрување на водоснабдувањето, канализациските системи, пречистителните станици и заштитата на животната средина, но нагласи дека инвестициите не се доволни без професионално и одговорно работење на институциите.
„Нашата обврска е да ја заштитиме животната средина, но пред сè здравјето на граѓаните. Очекуваме брза, темелна и транспарентна истрага, целосно расчистување на случајот и соодветна одговорност за сите инволвирани“, рече Хоџа.
На прес-конференцијата во Владата присуствуваа и портпаролката Марија Митева, директорката на Инспекторатот за животна средина Ивана Гиновска и директорот на Агенцијата за храна и ветеринарство Оливер Миланов.