Прашањето за висината на минималната плата треба да се реши преку директен дијалог помеѓу работниците и работодавачите, а Владата во тој процес може да има само улога на посредник. Ова е ставот што денеска од Тетово го изнесе премиерот Христијан Мицкоски, коментирајќи ги барањата на синдикатите.
„Нашиот став е јасен, работниците и работодавачите се тие кои што во бипартитен дијалог треба да најдат решение за минималната плата. Владата, во рамките на Економско-социјалниот совет, е само фасилитатор“, изјави Мицкоски.
Во однос на вработените во јавниот сектор, каде Владата се јавува како работодавач, премиерот потсети дека за најголемиот дел прашањата се веќе регулирани. За преостанатите 7.700 до 7.800 административни службеници, тој истакна дека понудата е веќе на маса.
„Нашиот предлог предвидува дека за две години и два месеца од денеска, вработените во државната администрација ќе имаат примања повисоки за минимум 40 проценти. Доколку синдикатите се согласат, подготвени сме да ја прифатиме уште утре“, порача Мицкоски.
Изјавата доаѓа по големиот протест на ССМ одржан неделава, каде се бараше минимална плата од 600 евра, наспроти сегашните 400 евра.