Премиерот Христијан Мицкоски денеска ја коментираше акцијата на Агенцијата за храна и ветеринарство (АХВ), која откри дека дел од млечните производи на пазарот содржат помалку млечни масти од она што е наведено на самите декларации.
Шефот на владата потенцираше дека во овој случај клучна е безбедноста на граѓаните, но упати критика до компаниите кои правеле манипулации со квалитетот.
„Најважното прашање е дали постои ризик по здравјето на граѓаните. Во конкретниот случај не станува збор за производи што директно би можеле да го загрозат здравјето. Сепак, проблемот е што декларираниот состав не се совпаѓа со резултатите од лабораториските анализи. Доколку тоа навистина се случувало, тогаш оправдано се поставува прашањето што сè се случувало во минатото. Станува збор за редовни контроли и проверки. Таквите контроли ќе продолжат и кај други производи. Штетата не е само морална, туку и финансиска. Сметам дека во вакви случаи под знак прашање се доведуваат и угледот на производителите и довербата на потрошувачите“, изјави Мицкоски, одговарајќи на новинарско прашње по отворањето на новиот базен Карпош.
Премиерот појасни дека инспекцијата не била вонредна, туку се работи за редовна контрола, додавајќи дека АХВ ќе продолжи, согласно своите законски надлежности, да ги презема сите неопходни мерки во овој случај.
Претходно, АХВ соопшти дека открила сериозни измами кај поголемите синџири маркети во земјава. Инспекторите тестирале вкупно 91 мостра од млеко, млечни и сувомесни производи од домашно производство и од увоз.
Од анализираните 45 мостри од млечната индустрија, кај дури 10 оператори со храна е констатирано дека производите отстапуваат од Правилникот за квалитет на земјоделските производи поради помал процент на млечни масти.
Поради лажно прикажување на процентите, АХВ веќе казни уште осум други оператори со храна. Овие производители и увозници ќе мора да платат парични казни во износ од по 1.050 евра во денарска противвредност за утврдените отстапки во нивните производи.