Премиерот Христијан Мицкоски, при денешниот увид во градежните работи на Универзалната сала, го коментираше актуелниот случај „27 април“, оценувајќи го како политички монтиран процес од страна на претходната власт. Според премиерот, квалификацијата „тероризам“ е целосно несоодветна за она што се случило.
Мицкоски призна дека имало престап за кој требало да се одговара, но остро ја критикуваше судската квалификација на настанот.
„Станува збор за политички монтиран случај од страна на претходната влада. Според мене, таму невини луѓе беа прогласени за терористи. Тие направија одреден престап и требаше за тој престап да одговараат, но не како терористи“, изјави премиерот.
Тој изрази жалење за состојбата во правосудниот систем, потенцирајќи дека сè почесто се појавуваат сведоштва за фингирани процеси, уцени и притисоци од минатото. Според Мицкоски, државата не може да оди напред без расчистување на клучните афери од тој период, при што ги посочи двете клучни прашања што бараат одговор: улогата на СЈО и Катица Јанева, како и вистината за настаните од „27 април“.
„Вистината мора да излезе на виделина за општеството да продолжи понатаму“, заклучи Мицкоски, додавајќи дека понатамошните постапки треба да се решаваат во рамките на правосудниот систем.