Премиерот Христијан Мицкоски, кој предводи владина делегација во официјална посета на Австрија, денеска во Виена ќе оствари клучна средба со австрискиот канцелар Кристијан Штокер. Разговорите ќе се фокусираат на продлабочување на билатералните односи, како и на актуелните европски и регионални прашања.
По средбата, двајцата лидери ќе се обратат на бизнис форум пред претставници на стопанските комори од двете земји. На форумот ќе биде реафирмирана економската соработка, со посебен акцент на можностите за нови австриски инвестиции во македонското стопанство и продлабочување на врските меѓу компаниите.
Во составот на владината делегација, покрај премиерот Мицкоски, се и вицепремиерот и министер за транспорт и врски, Александар Николоски, министерот за надворешни работи и надворешна трговија, Тимчо Муцунски, министерката за енергетика, рударство и минерални суровини Сања Божиновска, како и министерот за животна средина и просторно планирање, Муамет Хоџа.