Премиерот Христијан Мицкоски денеска порача дека Владата има јасен правец и стратегија за справување со економската криза, нагласувајќи дека нема да дозволи носење решенија под притисок кои би можеле да имаат долгорочни негативни последици. За време на посетата на Клиничкиот центар „Мајка Тереза“, тој истакна дека сегашните долгови кои државата ги враќа се токму резултат на минати избрзани и криминални политики.
Во однос на барањата за дополнително намалување на ДДВ-то за одредени производи, Мицкоски откри дека буџетот веќе трпи сериозни загуби.
„Во буџетот веќе има загуби на дневна основа кои бројат милион евра на ден, но како Влада владееме со ситуацијата. Предизвици ќе има, тешко е, треба да вратиме 2,5 милијарди евра долг, го враќаме и солидарниот данок, а од април почнуваме со исплата на платите по новите колективни договори“, изјави премиерот.
Мицкоски додаде дека неговата цел не е да создава паника кај граѓаните, туку да понуди стабилност преку внимателни анализи. Според него, подобро е да се направи чекор назад за добра анализа, отколку да се избрза со потези без стратегија.