Премиерот Христијан Мицкоски тврди дека Македонија статистички има „најниска и убедливо најниска цена“ на горивата, но посочи дека цените на бензините и дизелот не зависат директно од владините политики.
Одговарајќи на критиките за високите трошоци за граѓаните, Мицкоски рече дека е точно оти платите се ниски, но дека горивата се берзански производ.
„Тоа не зависи од претприемачка логика. Тоа не зависи од политики на Влада. Тоа е берзански производ и сите од иста берза купуваме“, изјави премиерот.
Според него, клучно е како се менаџира процесот од моментот на набавката до користењето од страна на граѓаните.
Мицкоски упати критики и до опозицијата, оценувајќи дека дел од политичките структури „се обидуваат од публика да креираат јавно мислење“, а кога имаат можност да направат нешто, „не само што ништо не прават, туку и уназадуваат“.
Тој порача дека, како што рече, „сеирот“ за цените ќе им го остави на оние кои „живеат во политичко мочуриште“, додавајќи дека тие „секогаш ќе останат политички маргиналци“.