Интензивни разговори за динамиката на европската интеграција и спроведувањето на клучните реформи беа во фокусот на денешниот работен состанок, каде преку специјално онлајн вклучување учествуваше и високиот европски претставник Герт Јан Копман. Премиерот Христијан Мицкоски преку социјалните мрежи информираше дека фокусот бил ставен на досегашните постигнувања и зацртаните чекори за наредниот период.
На состанокот посветен на Реформската агенда се разгледувала координацијата меѓу институциите, со акцент на неопходноста од навремено исполнување на преземените обврски.
„Денеска одржавме работен состанок посветен на Реформската агенда и процесот на европска интеграција, на кој преку онлајн обраќање учествуваше директорот на Генералниот директорат на Европската комисија за проширување и источно соседство, Герт Јан Копман.“
Во рамките на дискусијата со европскиот директор Копман, соговорниците се осврнале на конкретните чекори кои треба да обезбедат видливи резултати на терен и подобри услуги за граѓаните.
„Разговаравме за досегашниот напредок, следните чекори и координацијата меѓу институциите, со цел реформските процеси да продолжат ефикасно, навремено и во согласност со утврдените приоритети. Остануваме посветени на спроведување на реформите што ќе придонесат за поефикасни институции, подобри услуги за граѓаните и забрзан напредок на државата.“