Владата официјално го испрати до Европската Унија документот со кој се потврдува исполнувањето на речиси сите обврски од реформската агенца, освен Изборниот законик кој остана закочен во Собранието.
Премиерот Христијан Мицкоски вели дека блокадата на Изборниот законик нема да го промени впечатокот бидејќи, како што вели, во динамиката на реализација ќе бидеме далеку пред многу други.
„На 15 јули до Европската Унија беше доставен документ со целосно исполнети и означени обврски, со што уште еднаш покажавме дека реформскиот процес го водиме одговорно, транспарентно и со јасна посветеност кон исполнување на европската агенда. Уверен сум дека во динамиката на реализацијата ќе бидеме далеку пред многу други, и покрај обидите процесот да биде забавен преку блокирањето на Изборниот законик. Нашата определба останува непроменета, реформите ќе продолжат, затоа што тие се во интерес на државата, институциите и граѓаните“, напиша Мицкоски на Фејсбук.
Покрај државничките обврски, премиерот најави отпатува во Пелагонија. Прво на роденденот на Општинскиот комитет на ВМРО-ДПМНЕ во Битола, а потоа и на Пивофест во Прилеп.
„Воедно попладнево ќе присуствувам на одбележувањето на роденденот на Општинскиот комитет на ВМРО-ДПМНЕ во Битола, а вечерва ќе бидам дел од атмосферата на Пиво Фест во Прилеп, каде ќе имам можност да се сретнам и да разговарам со голем број граѓани. Продолжуваме посветено и забрзано за Македонија“, вели тој.